मोदीलाई ‘थ्रेट’ दिने थुनामा
काठमाडौं, १० भदौ
भारतीय प्रधानमन्त्री नरेन्द्र मोदीको भ्रमणका क्रममा शंकास्पद गतिविधिमा
संलग्न दुईजना बंगलादेशी नागरिक पक्राउ परेको खुलेको छ । १९ साउनमा पशुपति
मन्दिरबाट पक्राउ परेका उनीहरू अझै प्रहरी हिरासतमै छन् ।
मोदी पशुपति मन्दिरको दर्शनमा गएका वेला
शंकास्पद गतिविधि गर्ने बंगलादेशी नागरिकद्वय हसाइम इस्लाम र रियल मियाँलाई
प्रहरीले पक्राउ गरेको हो । मुस्लिम धर्मावलम्बी भए पनि हिन्दूधर्मको
पर्चा बाँडिरहेको अवस्थामा प्रहरीले उनीहरूलाई पक्राउ गरेको थियो ।
अनुसन्धानका क्रममा इस्लाम र मियाँ
बंगलादेशी नागरिक भएको खुलेको थियो । उनीहरूले नेपाली नागरिकतासमेत
लिइसकेको अनुसन्धानबाट पत्ता लागेको छ । प्रहरी स्रोतका अनुसार बाँकेको
कटरकुइया गाविस–४ बाट उनीहरूले नेपाली नागरिकता लिएका थिए । काठमाडौं
प्रहरीले नागरिकतासम्बन्धी मुद्दामा थप अनुसन्धान र कारबाही गर्न उनीहरूलाई
बाँके प्रहरीमा पठाएको छ ।
स्रोतका अनुसार इस्लामले जाहिर अली साई र
मियाँले असगा अली साईको नाममा नागरिकता लिएका हुन् । कर्मचारीहरूकै
मिलेमतोमा उनीहरूले नागरिकता लिएको स्रोत बताउँछ । दुईजनाको अनुसन्धान
अन्तिम चरणमा पुगेको र एक–दुई दिनमा मुद्दा दायर हुने बाँके जिल्लाका
प्रहरी प्रमुख एसपी शेखर कोइरालाले बताए ।
इस्लाम र मियाँ हिन्दू धर्मावलम्बीको
भेषमा मोदीले पूजा गर्ने वेला पशुपति मन्दिरमा पुगेका थिए । उनीहरू कुनै
अन्तर्राष्ट्रिय गिरोहमा आबद्ध भएको हुनसक्ने आशंका गरिएको छ । उनीहरूबारे
प्रहरीले विस्तृत विवरण गोप्य राखेको छ । नेपाल प्रहरीको विशेष ब्युरो
(एसबी)ले पनि उनीहरूमाथि छानबिन गरेको छ ।
बंगलादेशीलाई नागरिकताको सिफारिस गर्ने
व्यक्तिलाई प्रहरीले पक्राउ गर्न सकेको छैन । विदेशीलाई नागरिकता दिने
प्रशासनका कर्मचारीमाथि समेत छानबिन भएको छैन ।
भारतीय प्रधानमन्त्री मोदीको नेपाल
भ्रमणमा प्रहरीले सुरक्षा व्यवस्था निकै कडा गरेको थियो । उनी आवतजावत
गर्ने सडक एक घन्टासम्म खाली गराइएको थियो । सुरक्षा संवेदनशीलताकै आधारमा
भारतबाटै बुलेटप्रुफ गाडी ल्याइएको थियो । १८ साउनमा नेपाल आएका उनी १९
साउनमा स्वदेश फर्किएका थिए ।
No comments:
Post a Comment