September 21
भारतका विभिन्न स्थानबाट माछाका भुरा नेपाल ल्याइन थालेपछि नेपाली माछापालक कृषक मर्कामा परेका छन्।
क्वारेन्टाइन जाँचबिना नै भारतीय माछा कैलालीका विभिन्न नाकाबाट भित्रिने गरेका छन्। यसरी भित्रिने माछाका भुरा स्वास्थ्यका दृष्टिकोणले खान योग्य हुने/नहुनेप्रति किसानले चिन्ता व्यक्त गरेका छन्।
कैलाली जिल्लाको सुखडमा आयोजित भेलामा माछापालक किसानले यस्तो चिन्ता व्यक्त गरेका हुन्। मत्स्य विकास केन्द्र गेटाका वरिष्ठ मत्स्य बिकास अधिकृत महेशचन्द्र गुप्ताले सरकारी निकायको लापरबाहीले यस्तो भइरहेको बताए।
“किसानलाई मर्का परेको छ यस विषयमा सरकार गम्भीर बन्नुपर्छ”–गुप्ताले भने–“यसमा क्वारेन्टाइन विभागले समेत ध्यान दिनु आवश्यक छ।”
जिल्ला कृषि विकास कार्यालय धनगढीका वरिष्ठ कृषि विकास अधिकृत ग्रिसराज जोशीले माछापालक कृषकलाई विशेष योजना आवश्यक रहेको बताए। कैलालीमा माछापालनको ठूलो सम्भावना भएर पनि प्राविधिक ज्ञान नहुँदा प्रत्येक वर्ष किसानले घाटा बेहोर्नु परेको उनको भनाइ थियो।
किसान महासङ्घका केन्द्रीय सदस्य लहानु चौधरीले माछापालक कृषकका लागि सरकारले सुलभ रुपमा आवश्यक सामग्री उपलब्ध गराउनुपर्नेमा जोड दिए।
कैलालीका ३६ गाविस र चार नगरपालिकाका गरी १५० जनाभन्दा बढी किसानले व्यावसायिक रुपमा माछापालन गरिरहेका छन्। माछापालक किसान सङ्घ कैलालीका अध्यक्ष चुलराम चौधरीका अनुसार कैलालीमा ८३१ कृत्रिम ताल (पोखरी) र १९३ प्राकृतिक ताल रहेका छन्। रासस
