चिनीको अधिकतम खुद्रा मूल्य तोक्न निर्देशन

काठमाडौं, 10 भदौ
केन्द्रीय अनुगन तथा मूल्यांकन समितिले आसन्न चाडपर्वका लागि  बजारमा मूल्यवृद्धि नियन्त्रण गर्न चिनीको अधिकतम खुद्रा मूल्य (एमआरपी) निर्धारण गरी मूल्य नियन्त्रण गर्न वाणिज्य तथा आपूर्ति मन्त्रालयलाई निर्देशन दिएको छ । समिति मुख्यसचिवको अध्यक्षतामा निर्माण हुन्छ ।

बजारमा हाल चिनीको औसत मूल्य प्रतिकेजी ६८ रुपैयाँ रहेको नेपाल खुद्रा व्यापार संघले जनाएको छ । चाडपर्वमा मूल्य बढ्ने प्रवृत्तिलाई रोक्न समितिले वाणिज्य मन्त्रालयलाई सुरुवाती चरणमा एमआरपी तोक्न निर्देशन दिएको प्रधानमन्त्री कार्यालयका सचिव शान्तराम सुवेदीले जानकारी दिए ।

‘बजार मूल्य नियन्त्रण गर्न सक्ने गरी तत्काल चिनीको खुद्रा मूल्य तोक्न सोमबारको बैठकले निर्देशन दिएको छ,’ उनले भने । मन्त्रालयले मातहतको साल्ट ट्रेडिङ लिमिटेडसँग सहकार्य गरी चिनीको एमआरपी तोक्नेछ । तर, पछिल्लो २ वर्ष खुला बजारमा खाद्यान्नको एमआरपी तोक्न गाह्रो भएको भन्दै वाणिज्य मन्त्रालयले कुनै पनि खाद्यान्नको एमआरपी तोकेको छैन ।

मन्त्रालयका सहसचिव दीपक सुवेदीले खुला बजारमा एमआरपी तोक्न गाह्रो हुने भएकाले पछिल्लो २ वर्ष नसकिएको जानकारी दिए । ‘चाडपर्वको मुखैमा मूल्यवृद्धि नियन्त्रण गर्न भन्दै ३ वर्षअघि १४ खाद्यान्नको एमआरपी तोकिए पनि २ वर्षयता सकिएको छैन,’ उनले भने ।

एमआरपी तोक्दा बजारमा सामग्री सस्तिन थाल्ने वा व्यापारीको लागत बढेर महँगिन सक्ने देखिएकाले गाह्रो भएको उनले बताए । यद्यपि, विभिन्न संस्थान परिचालन गरेर चाडपर्वमा मूल्य नियमनका लागि अधिकतम प्रयास गर्ने तयारी भएको उनले बताए ।

‘साल्ट ट्रेडिङ, नेसनल ट्रेडिङ, खाद्य संस्थानलगायतलाई परिचालन गरी दैनिक उपभोग्य वस्तुको मूल्य नियन्त्रण गर्ने प्रयास हुँदै छ,’ उनले भने । सरकारले यो वर्ष १ असोजबाट १५ कात्तिकसम्म सहुलियत पसल सञ्चालन गर्ने जानकारी दिइसकेको छ । सहुलियत पसलबाट खाद्यान्न र नुनमा २/२ रुपैयाँ प्रतिकेजी र चिनीमा ५ रुपैयाँ प्रतिकेजी छुट दिने सरकारको तयारी छ ।

सहसचिव सुवेदीका अनुसार १ असोजबाट सुरु हुने सहुलियत पसलमा साल्ट ट्रेडिङले राजधानीमा १० वटा, नेसनल ट्रेडिङ र खाद्य संस्थानले समान ८ वटा पसल सञ्चालन गर्ने तयारी गरेका छन् । दुग्ध विकास संस्थानले समेत यो अवसरमा सहुलियत पसल राख्नेछ ।