राउतलाई रिहा नगरे पुनः मधेश आन्दोलन गर्ने

September 21
सुरक्षा घेरामा ‘सिके आन्दोलन’

पक्राउ परेका डा. सीके राउतलाई अबिलम्ब रिहा गर्नुपर्ने माग राखी मधेशी अगुवाहरुले शनिबार सिरहाको लहानमा जुलुस प्रदर्शन गरेको छन्। 

पशुपति आदर्श उच्च माविबाट निकालेको जुलुस नगरको विभिन्न भागमा परिक्रमा गरी लहानस्थित शहिद चौकमा पुगेर कोणसभामा परिणत भयो। कोणसभामा बोल्दै मधेशी अगुवाहरुले भोलिदेखि आन्दोलन सशस्त्र पार्ने चेतावनी दिएका छन्।

मेधशी जनअधिकार फोरम गणतान्त्रिकका केन्द्रीय सदस्य विष्णु गुप्ताले मधेश विरोधी सरकारले राउतलाई पक्रेर मधेशीमाथि अन्याय गरेको बताए। उनले आक्रोसित हुँदै भने, ‘राउतलाई अबिलम्ब रिहा गर्नुपर्छ। होइन भने भोलिदेखि शसक्त आन्दोलन थाल्छौं।’

यस्तै सद्भावना पार्टीका जिल्ला अध्यक्ष भरतप्रसाद साहले शान्तिपूर्ण आन्दोलनले सरकार नसुने जुनसुकै खालका आन्दोलन गर्न तयार गरेको चेतावनी दिए। उनले ८५ प्रतिशत कर मधेशबाट उठेपनि पहाडीले शासकले मधेशीमाथि दमन गर्ने गरेको बताए। यस्तै रबैया रह्यो भने भोलीको दिनमा मधेशबाट राजश्व उठाउन नदिने उनले चेतावनी दिए।

कोणसभामा बोल्दै यूवा फोरम लोकतान्त्रिकका केन्द्रीय सदस्य रामऔतार शर्माले राउतलाई रिहा नगरे पुनः मधेश आन्दोलन गर्ने चेतावनी दिए। 

उनले लहानबाटै माघ ५ गते मधेश आन्दोलन गरेको प्रसँग उल्लेख गर्दै भने, ‘मधेश आन्दोलनमा त ५ जना मात्र शहिद भयो। अबको आन्दोलन भयो भने त्यस्ता सयौं यूवा शहिद हुन तयार छ। म स्वयंम शहिद हुन तयार छु। तर मधेश स्वतन्त्र गरेर छाड्छु।’

कोणसभामा अनिल झा नेतृत्वको सद्भावना पार्टीकी नेतृ आशा पाल, नागरिक समाजका प्रताप यादब लगायतले आ आफ्नो मन्तव्य राखेका थिए। मन्तव्य राख्ने अधिकांशले राउतलाई रिहा नगरे पुनः मधेश आन्दोलन हुने चेतावनी दिएका छन्।

जुलुसको अगाडि पछाडि ईलाका प्रहरी कार्यालय लहानका इन्सपेक्टर सन्तोष निरौला नेतृत्वको टोलीले घेरा हालेको थियो। जुलुसको अगाडी नेपाल प्रहरीको गाडी र सुरक्षाकर्मी थियो भने पछाडी इन्सपेक्टर निरौला स्वयंम गार्डका साथ थिए। छेउछाउमा समेत सुरक्षाकर्मी तैनाथ देखियो।

इन्सपेक्टर निरौलाले सेतोपाटीसँग भने, ‘आन्दोलनका क्रममा गलत गतिविधि हुने सम्भावना बढी हुन्छ। त्यसैले सुरक्षाकर्मीको उपस्थिति बाक्लो पारेका छौं।’