चटनीमा लडिबुडी

31 August 

स्पेनको पूर्वी क्षेत्रमा रहेको बुनोल नाम गरेको गाउँ छ, जहाँ सडक वर्षमा एकपटक टमाटरमय हुन्छ । टोमाटिना फेस्टिभलका हजारौँ सहभागीहरूले एक–अर्कालाई टमाटर प्रहार गर्ने गर्छन्, जसकारण फेस्टिभलमा सहभागी मानिस र बुनोल गाउँ वर्षको एकपटक पूरै रातो बन्छ ।

यस वर्षको फेस्टिभल बुनोलमा आयोजना भएको छ । फेस्टिभलका लागि भनेर एक सय २५ टन पाकेको टमाटर गाउँ भित्र्याइएको थियो । फेस्टिभलमा सहभागी हुन भनेर देशविदेशबाट करिब २२ हजार मानिस बुनोल पुगेका थिए । टोमाटिना फेस्टिभलमा सहभागी हुन विभिन्न देशका मानिस स्पेन पुग्ने गर्छन् । विदेशबाट सहभागी हुन आएकासँग यसपटक प्रतिव्यक्ति १३ डलर लिइएको थियो ।

सन् १९४५ मा बुनोलको टमाटर खेती हुने ठाउँमा केटाकेटीको झगडा भएको थियो । झगडाका क्रममा केटाकेटीले एक–अर्कालाई टमाटर प्रहार गर्दा घटनास्थल पूरै रातो भएको थियो । यसपछिका वर्षमा यसलाई पर्वकै रूपमा मनाउन थालियो । टोमाटिना फेस्टिभललाई खाद्यपदार्थबाट लडिने यो संसारकै सबैभन्दा भव्य लडाइँ मानिन्छ ।