बेनी–जोमसोम सडकमा भाडादर समायोजन

September 21

धौलागिरी अञ्चलका चारैजिल्ला म्याग्दी,बागलुङ,पर्वत र मुस्ताङका प्रमुख जिल्ला अधिकारी,सुरक्षा निकायका प्रमुख,यातायात व्यवसायी र यातायात व्यवस्था कार्यालयका प्रतिनिधिहरुको शुक्रवार बागलुङमा सम्पन्न बैठकले नयाँ भाडादर समायोजन गरेको छ।

 

धौलागिरी यातायात व्यवस्था समितिको बैठकले बेनी–जोमसोम सडकमा संचालन हुने सवारी साधनमा प्रतिव्यक्ति ७५० रुपैयाँ भाडादर कायम गरेको म्याग्दीका प्रमुख जिल्ला अधिकारी टेकवहादुर केसीले जानकारी दिए। यसअघि यातायात व्यवसायीहरुले ८सय रुपैयाँ लिने गरेको थिए।

 

बेनी–जोमसोम सडकखण्डमा बाढि र पहिरोका कारण अहिले दुई ठाउँमा सवारी साधन परिवर्तन गर्नुपर्ने वाध्यता यात्रुहरुलाई रहेको छ। समितिले दसैं अघि नै सडक मर्मत गरेर सिधा यातायात संचालन गर्ने जनाएको छ। बेनी–जोमसोम सिधा यातायात संचालन भएपछि विदेशी पर्यटक,तीर्थयात्री र सर्वसाधारणहरु लावान्भित हुनेछन्।