एडिबीलाई स्थानीय मुद्रामा ऋणपत्र जारी गर्न स्वीकृति

काठमाडौं, August 31
एसियाली विकास बैंक (एडिबी)ले नेपालका जलविद्युत् आयोजनामा लगानीका लागि ५० अर्ब रुपैयाँको ऋणपत्र (बन्ड) जारी गर्ने प्रस्ताव मन्त्रिपरिषद्ले स्वीकृति गरेको छ । शुक्रबार बसेको मन्त्रिपरिषद्को बैठकले एडिबीको ऋणपत्र जारी हुने प्रस्ताव स्वीकृत गरेको अर्थ मन्त्रालयका सचिव सुमनप्रसाद शर्माले जानकारी दिए ।

एडिबीले नेपाली रुपैयाँमा जारी गरिएको ऋणपत्रबाट उठेको रकम ८ जलविद्युत् आयोजनामा लगानी गर्ने प्रस्ताव अर्थ मन्त्रालयमा पेस गरेको थियो । ‘एडिबीले ऋणपत्रबाट उठाएको रकम लगानी गर्ने जलविद्युत् आयोजना नै तोकेर निवेदन दिएको थियो । मन्त्रिपरिषद्ले यसैलाई स्वीकृत गरेकाले एडिबीले ऋणपत्रमार्फत उठाएको पैसा जलविद्युत् आयोजनामै लगानी हुन्छ,’ उनले भने ।

एडिबीले मुलुकभित्र र बाहिर छरिएर रहेको रकम ऋणपत्रमार्फत नेपाली रुपैयाँमा बटुलेर जलविद्युत् आयोजनामा लगानी गर्न लागेको हो । एडिबीले पूर्वाधार निर्माणका लागि भारत, मलेसिया, थाइल्यान्डलगायतका मुलुकमा स्थानीय मुद्रामा बन्ड जारी गरिसकेको छ ।

अन्तर्राष्ट्रिय संस्थालाई नेपाली रुपैयाँमा ऋणपत्र जारी गर्न पहल गरेको एडिबीले गत साउनको अन्तिममा ऋणपत्र जारी गर्ने प्रस्ताव अर्थ मन्त्रालयमा पेस गरेको थियो । सरकारले यसअघि विश्व बैंक समूहको अन्तर्राष्ट्रिय वित्त निगम (आइएफसी)लाई नेपालको पूर्वाधार, कृषि र पर्यटन क्षेत्रमा लगानी गर्न ५ वर्षका लागि ५० अर्ब रुपैयाँ (५० करोड अमेरिकी डलर)को ऋणपत्र जारी गर्न स्वीकृति दिइसकेको छ ।

ऋणपत्र जारी गर्दा ठूला परियोजनाका लागि ठूलो पुँजी संकलन हुने र लगानीकर्ताको जोखिम न्यूनीकरण भई प्राथमिकताप्राप्त क्षेत्रमा लगानी परिचालन गर्न सघाउ पुग्नेछ । ऋणपत्र (बन्ड) जारी गर्ने संस्थाले नै लगानीमा रहेको भुक्तानी जोखिम (डिफल्ट रिक्स) पूर्ण रूपमा व्यहोर्ने र लगानीकर्तालाई रकम फिर्ता दिने हुँदा लामो अवधिका लागि वित्तीय स्रोत जुटाउन सहज हुनेछ ।

ऋणपत्रबाट नेपाली मुद्रामा रकम उठाएर लगानी गरिने हुदा अमेरिकी डलरमा भइरहने उतारचढाबका कारण हुने विदेशी मुद्रा विनिमय जोखिम व्यहोर्नुपर्ने छैन । ऋणपत्रमार्फत आन्तरिक रूपमा वित्तीय साधन परिचालन भई विदेशी ऋणको भार न्यून हुने, संस्थागत लगानीकर्तालाई दीर्घकालीन लगानी गर्न सुरक्षित उपकरण उपलब्ध हुने, पुँजी बजार विकासमा सघाउ पुग्ने र तरलता व्यवस्थापनमा सघाउ पुग्ने अर्थको अपेक्षा छ ।