छुरा प्रहार गर्नेलाई पाँच वर्ष कैद, बहुविवाह गर्ने पक्राउ

September 17
जिल्ला अदालत इलामले एक युवकलाई छुरा प्रहार गरी ज्यान मार्ने उद्योगअन्तर्गत मुद्दा खेपिरहेका पशुपतिनगरका दुईजनालाई ५/५ वर्ष कैद सजाय सुनाएको छ। जिल्ला न्यायाधीश प्रकाश ढुङ्गानाको इजलासले ज्यानसम्बन्धी महलको १५ नम्बरबमोजिम पशुपतिनगर–८ का २० वर्षीय कुशल राई र २२ वर्षीय वचन राईलाई मङ्गलबार कैद सजाय सुनाएको अदालतका नायब सुब्बा रबिन अधिकारीले जानकारी दिए।

 उनीहरूले पशुपतिनगरका चन्द्र यल्मुलाई गत जेठ ६ गते बेलुका छुरा प्रहार गरी गम्भीर घाइते बनाएका थिए। यसैबीच बहुविवाह गरेको आरोपमा नयाँबजार–४ लप्सीबोटेका २७ वर्षीय मनकुमार भण्डारी र शान्ताकुमारीलाई प्रहरीले पक्राउ गरेको छ। भण्डारी वैदेशिक रोजगारको सिलसिलामा साउदी अरबमा रहँदा चिनजान भई नेपाल आएलगत्तै प्यूठान बादींकोट–७ की २३ वर्षीया शान्ताकुमारी खत्रीसँग भदौ १९ गते दोस्रो विवाह गरेका थिए। 

भण्डारीले दोस्रो विवाह गरेपछि जेठी श्रीमती मनमायाले श्रीमान्विरुद्ध सोमबार इलाका प्रहरी कार्यालय पशुपतिनगरमा किटानी जाहेरी दिएकी थिइन्। प्रहरीले दुवैलाई पक्राउ गरी बहुविवाह मुद्दामा म्याद थप गरी अनुसन्धान सुरु गरेको इप्रका पशुपतिनगरका प्रहरी निरीक्षक ईश्वर थापाले बताए। रासस