सफ्टटेक हामिले जान्कारिमुलक बनाउन खोजेका छौ

September 7

कम्प्युटर एसोसियसन अफ नेपाल (क्यान) ले भदौं २६ देखि २९ सम्म राजधानीको भृकुटीमण्डपमा सुबिसु क्यान सफ्टेकको आयोजना गर्दैछ। हरेक वर्ष सफ्टवेयरका विषयमा आयोजना गर्ने सफ्टेक मा ५५ वटा कम्पनीका एक सय ४२ वटा स्टलहरु रहेका छन्। मेला आयोजना, आकर्षण र तयारीका विषयमा मेला संयोजकसँग घटना र बिचारले गरेको छोटो कुरकानी : 


सुबिसु क्यान सफ्टेकको तयारी कस्तो छ?
सुबिसु क्यान सफ्टेकको सम्पूर्ण तयारी लगभग अन्तिम चरणमा रहेको छ। सफ्टेकलाई भव्य रुपमा सम्पन्न गर्नका लागि हामीले हाम्रो तर्फबाट भरपुर प्रयास गरिरहेका छौं। स्टल बुकिङ पनि सबै भइसकेको अवस्था छ। यसपाली मेलामा ५५ वटा कम्पनीका एक सय ४२ वटा स्टल रहनेछन्। हामीलाई स्पोन्सर गर्नेहरुले पनि सहयोग गरिरहनुभएको छ। हाम्रो तयारी लगभग पूरा नै भएको छ।

यसपालीको सफ्टेकको आकर्षण के छ?
वास्तवमा सफ्टेकमा सहभागीता जनाउने सबै कम्पनी नै आकर्षण हुन्। हामीले सफ्टेकलाई आइसिटीको रुपमा अगाडी बढाएका छौं। मेलामा आइसिटीको सर्भिस, सोलुसन र कम्प्युनिकेसनरहन्छ। नेपालमा डेभलप भएका सफ्टवेयर, यसको प्रयोग, आइसिटीसम्बन्धी उपलब्ध सेवा सुविधासँगै त्यसको जानकारी दिने र मोबाइल एप, मोबाइल कम्पनी, आइएसपी कम्पनी, सेक्युरिटी सोलुसन, पावर सोलुसन, भर्चलाइजेसनलगायतका सेवा हामीले यसपाली सफ्टेकमा प्रदर्शनी गर्ने भएका छौं। त्यस्तै क्लाउड कप्युटिङलाई पनि जोड दिएका छौं। डाटा सेन्टर, भर्चलाइजेसन, डिजिलाइजेसनका नयाँ स्वरुप पनि देखा पर्नेछ। म्यानेज भिडियो, अडियो, भिडियो कन्फेरेन्सन, थि्रजी, वाइम्यााक्स पनि रहन्छन्। टिकटका लागि गएको वर्षजस्तै अनलाईनको पनि सुविधा छ। टिकटदर साधारण ५० र विद्यार्थीका लागि २५ रुपैयाँ तोकेका छौं। सामुदायिक विद्यालयका लागि निःशुल्कको व्यवस्था पनि छ। प्रदर्शनीमा आएपछि दर्शकले पाउने सूचना त छदै छ। उही कम्पनी उही वस्तु भएपनि नयाँ संस्करणमा उपलब्ध हुन्छ।

 सफ्टेक पनि इन्फोटेक शैलीकै मेला हुँदै गएको छ नि?
सफ्टेकर इन्फोटेकमा ठूलै फरक छ। इन्फोटेकमा व्यापार बढी हुन्छ। त्यहाँ व्यापारकै योजना हुन्छ र स्किम र अफर दिएर आकर्षण हुन्छ। सफ्टेकमा बढी सूचना र जानकारी हुन्छ। सफ्टेकमा धेरैभन्दा धेरै सूचना र जानकारी कसरी प्रदान गर्ने भन्ने नै मुख्य उद्देश्य रहन्छ। सफ्टेकको मेलामा ब्रान्डिङ गरेर बिजनेस पछि गरिन्छ। इन्फोटेक र सफ्टेकमा एउटै कम्पनीले भाग लिन सक्छन तर तिनीहरुले दिने सेवा फरक हुन सक्छ। एउटै कम्पनीले हार्डवयर र सफ्टवेयरमा सेवा दिएको छ भने सफ्टेक मेलामा सफ्टवयरलाई फोकस गरेर सहभागिता जनाएको हुन्छ। उदाहरणका लागि न्युटेरिकले डेल लगायका ल्यापटप बेच्ने भएपनि सफ्टेक मेलामा सफ्टवेयरसम्बन्धि नै फोकस गर्छ। त्यस्तै सुबिसुले पनि त्यस्तै गर्छ। विशेषगरी सर्भिस, सेक्यूरिटी सोलुसन र कम्युनिकेसनलाई मेलामा रहन्छ। हार्डवेयर ज्यादै न्युन हुन्छ। हामीले यो मेला सूचनामुलक र जानकारीमुलक नै बनाउन खोजेका हौं। कम्पनीहरुले पनि सेल्सलाई खासै प्रवर्द्धन गर्दैनन्। त्यसैल यो इन्फोेटेकभन्दा फरक हो।  

सफ्टवेयरमा ठूलो काम गर्ने आउटसोर्सिङ कम्पनीहरुको सहभागिता देखिदैन्,किन?
 सही कुरा उठाउनु भयो। नेपालमा बसेर विदेशी कम्पनीका लागि काम गर्ने आइटी आउटसोर्सिङ कम्पनीहरु धेरै छन् तर तीनीहरुले मेलामा सहभागिता जनाउन रुचि राखेका छैनन्। मेलामा सहभागितामात्र होइन मूलधारमा आएर काम गर्न पनि खोजिरहेको अवस्था छैन। हामीले धेरै पटक ती कम्पनीलाई प्रवर्द्धन गर्ने खोजेका हौं। तर, उनीहरुकै सहयोग भएन। उनीहरुलाई नै हामीले हौसला दिन खोजेका छौं तर उनीहरु नै आउन चाहदैनन्। उहाँहरुले हाम्रो बजार नेपालमा होइन भनेर प्रदर्शनीमा आउन चाहना नै राख्नु हुन्न। नेपालमा बजार होइन किन आवश्यक छ भन्ने प्रश्न गर्नुहुन्छ। हामीले हार्डवयर क्षेत्रलाई भन्दा पनि यस्ता कम्पनीलाई नै प्रोत्साहन गरिरहेका छौं। नेपालको आइसिटी क्षेत्र विकास गर्न बिपिओ, सफ्टवेयरकै विकास हुनुपर्छ भन्ने हामीले सोचेका छौं। उहाँहरु किन आउन चाहनुभएको छैन, यो हाम्रो लागि पनि प्रश्नहो।  

क्यान संघबाट महासंघमा जाने प्रक्रियामा छ। कहिलेसम्ममा क्यान महासंघ होला?
 हामीले गतबर्ष नै विशेष साधारण सभा गरेर क्यान महासंघमा जाने निर्णय गरेका हौं। क्यानको अहिले जुन संस्थागत संरचना छ। क्यान ५७ जिल्लामा रहेको छ। हाम्रो आफ्नै सदस्यताको प्रकार छ। यसले गर्दा हामीले राष्ट्रिय ऐन २०१८ अनुसार दर्ता भएर महासंघ बन्नुपर्छ भन्ने हाम्रो माग हो। अहिल्यै हामी महासंघजस्तो संरचनामा रहेका छौं। स्थापनाकालदेखि नै सूचनासञ्चार तथा प्रविधि क्षेत्रमा जुन भूमिका खेलेको छ। त्यसैले हामीले प्रसासनदेखि सम्बन्धित निकायमा हामीले हाम्रो कागजपत्र दिइसकेका छौं। त्यो दिएको पनि एक बर्ष हुन लाग्यो। अहिले हाम्रो फाइल गृह मन्त्रालयमा गएर अड्किएको छ। त्यो अहिले विचाराधिन अवस्थामा छ। हामीले सकेसम्म चाँडो प्रक्रिया अगाडि बढाउन अनुरोध गरिरहेका छौं। अब क्यानको चुनाव महासंघ भैसकेपछि मात्र हुन्छ कि भन्ने हाम्रो सोच हो। त्यसैअनुसार हामी अगाडि बढिरहेका छौं। क्यानले सूचनाप्रविधिमा पुर्याकएको योगदान, यसको राष्ट्रिय तथा अन्तर्राष्ट्रिय छवि सबै हिसाबले पनि यो महासंघ बन्नुपर्छ। नेपाल सरकारले पनि राष्ट्रिय ऐन अनुसार दर्ता गरेर सहयोग गर्नुपर्छ। हाम्रो यो माग पनि हो र अनुरोध पनि हो।  

सफ्टटेककै विषयमा अन्त्यमा केहि छ कि?
 सूचनाप्रविधि प्रयोग गर्ने र सरोकारवालाहरुलाई मेला अवलोकन गर्न आउनुस भन्न चाहन्छु। यदि तपाईले यो कुनै कारणले छुटाउदै हुनुहुन्छ भन्ने साँच्चै तपाईले सूचनाप्रविधिको केहीकुरा छुटाउदै हुनुहुन्छ। यो एउटा अवसर होत्यसैले समय मिलाएर मेला अवधिभर आउन निमन्त्रणा दिन चाहन्छु। सबैलाई हार्द्धिक स्वागत गर्न चाहन्छु।